9
Dɩ -nʋa 'mʋa- 'a "kuan 'mʋ mamaʋ 'sʋ ɛ je 'blʋa jeun -nɩa 'de Sudɛn 'ɛ 'jrʋ 'a blʋ 'ɩn fɔo o, 'blʋa 'a 'fɔ -nɩa 'de crʋ 'di i o, wlao -nɩa 'de "ni -kwli i ke -jɩ -nɩa 'de Meditelane' -ɛ mua -ɛ -nynia 'de Diban "juei: Ɛtɩ -nyʋ, Amɔɔ nyʋ, Kanaa nyʋ, Felesi nyʋ, Ɛfi nyʋ ke Sebusɩ -nyʋ 'a 'blʋa jeʋn jɛɛ-. 2 'Sʋ ʋʋpʋ beɛ o -wɛe ʋʋa' "sooa 'a "jrukpɔ i -tenyʋ nɩ due' 'de ʋʋ 'je Sosue' ke Israɛ -nyʋ tʋ o -fʋn'.3 -Jɛ Gabaɔn nyʋ 'wɔan dɛ Sosue' nʋa Seriko ke Ai nyʋ "jri i 'sʋ ɛ, 4 ʋʋ pooɛ -tɩ' ʋʋ 'je 'srɛ "jri 'dei 'pɛn: Ʋʋa mua a, ʋʋ -saa ʋʋa' -cɛ" "i -wɛe ʋʋ "jii ʋʋa' Soofae' blɔ -doa o, -difɛn' 'di podɩ Soaa -ɩ -faea' i -wɛe nyʋ 'nɩa 'dɩ -pʋn" ʋʋ "pa a 5 Ʋʋ paa "kwlai Soaa ʋʋ 'poan 'bɩ -wɛe ʋʋpʋ paa "bai -ɩ -wee' 'faea 'ʋn, -dipɛn' -kmua "kbɔ "kbɔ 'de -ɛ -puue a mɛ ʋʋ "duo 'ʋn, -ɛ -je ʋʋpʋ 'a diidɛ nɩ-. 6 Ʋʋ muɛ -ta nyʋ a -kwlea' 'de Kilgalɩ -wɛe ʋʋ jɛɛ Sosue' ke Israɛ -nyʋ -wɛe ʋʋ 'na: -Aa -wlʋɛ 'de 'blʋa -tɔɔn 'di, -a 'ji wɛe -a -je aopʋ i bae -a -je dbɛɛdɛ -tu" 'de -a 'nynɩ.
7 Israɛ -nyʋ -sɛ "kpei ka 'de Ɛfi nyʋ -pee: Nyɔ -juo nɛ -bo ao se nyʋ -nɩa -a 'dewei -ta 'a deejrʋ' nɩ -ɛ? -Bo ɛ nɩ 'kaan -mɛ -a se 'bɛɛ -a -ke ao 'je dbɛɛdɛ 'ɛ wlu -tie" cɛn.
8 'De ʋʋ -sɛ "kpei ka 'de Sosue' -pee ʋʋ 'na: -A -nɩɛ "i -a -je -ma "juɛi nʋʋ nyʋ nɩ-.
Sosue -teɛ' ʋʋpʋ i ka ɔ 'na: Nyɔ ao nɩ mɔ 'sʋ -ɛ, 'de -ta aopʋ 'wlʋ -ɛ? 9 Ʋʋpʋ -sɛ "kpei ka 'de ɔ -pee ʋʋ 'na: -Ma "juɛi nʋʋ nyʋ a 'wlʋɛ 'e 'blʋa -tɔɔn 'di, 'de Nyɔsoa -ma Kea 'a 'nynɩ 'wlʋa 'a -tɩ' 'ʋn ɛ: -A -wɔn dɩ ɛ nʋa 'mɛ 'de Esipʋ, 10 -wɛe dɩ ɛ nʋa Amɔɔ -nyʋ 'a 'blʋa jeʋn 'sɔɔn -nɩa tʋbo" 'de Sudɛn -gbuu 'a 'fɔ -sia 'e mʋ o "jri i, Siɔn, Ɛsbɔn 'ɔ blʋa jei ke Ɔkɩ -nɩa 'blʋa jei 'de Basan 'de -ɔ -tea 'de Astarɔ ɛ. 11 'Sʋ -aa klae" ke nyʋ "klein -nɩa 'de -aa 'blʋa 'di wluɛ -a -pee ʋʋ 'na: Diidɩ ao 'jea di 'de -jei" ao "dʋɩ 'ʋn, ao jɛɛ Israɛ -nyʋ -mɛ ao 'da ka 'de ʋʋpʋ -pee: -A -nɩɛ "i -a -je aoa' "juɛi nʋʋ nyʋ nɩ-, ao ke -a -tu" dbɛɛdɛ. 12 Ao -gbʋn -aa -dipɛn' ja, ɩ nɩɛ nɛ' 'dee -ta -aa "duɛ 'ʋn 'de -aa -gbu" -sɔn -wɛe -a -jea jei" 'kpa a, -a -kpa -jei" -wɛe -a -jɛa aopʋ jɛɛ -ta -mɛ ɩ -wee' mɩ -jea' 'soɛ -wɛe -ɩ -puue'! 13 Ao -gbʋn -aa nmɔ bi ja: Ɩ nɩɛ dee' 'dee- -ta -aa -jii" nɩ ɛ, ɩ mɩ -wee' "klein wa 'de ka, ao -gbʋn -aa 'ʋnpaadɩ ke -aa "kwlai, ɩ -wee' doa' 'de -jeblʋ -tɔɔn -a -na 'ʋn 'a -tɩ' 'ʋn.
14 Israɛ -nyʋ "duo Gabaɔn nyʋ 'a diidɩ 'ʋn 'ɛ, 'kaa ʋʋ se Nyɔsoa i -tee 'de ɛɛ' -tɩ' "kpei. 15 Sosue' 'wɔɔn ɔ ke ʋʋpʋ 'a 'flɛ 'ʋn nɩa' 'mɛ -wɛe ɔ po dbɛɛdɛ -ɛ -jea nʋ -wɛe ʋʋ sea ʋʋpʋ 'dba i 'de ʋʋpʋ 'nynɩ 'de ʋʋa' "jrukpɔ i -tenyʋ cɛn ɛɛ' wlu -tie".
16 Ʋʋ -tua" dbɛɛdɛ ɛɛ' wɩ taan -sia' 'sʋ, Israɛ -nyʋ 'wɩɩn ka nyʋ -ke ʋʋ wlua 'mʋa- nɩa 'de 'blʋa -ke ʋʋ -kɔn" a i -nɩa 'mʋa- 'di 'a nyʋ ɛ. 17 Dɛ-nʋɛ' mɛ -nɩ Israɛ -nyʋ 'kpa -jei" ɛɛ' 'wɩ taan -nɩ "kpei 'sʋ ʋʋ nyni ɛ 'de nyʋ -nʋ 'a "kwi -kwlɔ -ɩa 'nynɩ nɩa Gabaɔn, Kefira, Beerɔtɩ ke Kiliatɩ Ɩarimʋ 'dii. 18 'De wlu Israɛ -nyʋ 'a "jrukpɔ i -tenyʋ cɛan -tie" 'de Nyɔsoa Israɛ 'a Kea 'a 'nynɩ 'ʋn 'a -tɩ' 'ʋn ɛ, ʋʋ se ʋʋpʋ 'dba. Israɛ -nyʋ -wee' "klein -teɛ ʋʋpʋ 'dei wlua' -pʋn", 19 'kaa Israɛ -nyʋ 'a "jrukpɔ i -tenyʋ -sɛ "kpei ka 'de Israɛ -nyʋ -wee' -pee ʋʋ 'na: -A cɛn wlu -tie" 'de Nyɔsoa Israɛ -nyʋ 'a Kea 'a 'nynɩ 'ʋn, -a se 'bɛɛ -a -je nyʋ -nʋ dɛsaʋn "jrii nʋ. 20 'Kaa ka -jea ʋʋpʋ nʋ 'ka ka: -Jɛ -a cɛan wlu -tie" ɛ -aa muɛ ʋʋpʋ "i "taa ʋʋ 'je 'kmʋ nɩ, -bo ɛ nɩ 'kan -mɛ -a se Nyɔsoa 'a 'cɛn 'de -a "kpei jai 'de -aa -se' wlu -a cɛan -tie" 'a -tɩ' 'ʋn.
21 Ʋʋ muɛ 'kmʋ nɩa' -mɛ! 'Kamɔ Israɛ -nyʋ -wee' 'a klae" 'da 'de ʋʋpʋ -pee. 'Kaa ʋʋa muɛ Israɛ -nyʋ -wee' 'a nae 'saan, ʋʋ 'je ʋʋpʋ 'a "ni -cri' -ke.
Ka ʋʋa' "jrukpɔ i -tenyʋ 'da 'kamɔ -nao. 22 Sosue' 'da Gabaɔn nyʋ -wɛe ɔ -tee ʋʋpʋ i ka: Dɛɛ -tɩ ao poo -a 'srɛ i -wɛe ao 'na ao 'wlʋɛ 'e tɩnkpɛɛ -ɛ? 'De -mɛ ao "tiɛ 'de -a -pʋn" -taa? 23 'Bo de la, 'daɩn kpʋn aopʋ 'mɛ! Ao se kʋʋɔn nɩ -tɩ 'bɔ i, ao muɛ nae 'sai ke "ni -cri i nɩa' 'de 'ma Kea 'a -gbu" 'di.
24 Ʋʋ -sɛ "kpei ka 'de Sosue' -pee ʋʋ 'na: Dɛɛ -tɩ -a nʋa 'kan ɛ ka: -A -wɔn 'ɛ ka Nyɔsoa aoa' Kea 'tmʋa Moisɩ ɛɛ' dbo nʋɩ ka ɛɛ mua aopʋ 'blʋa -nɛ aopʋ "nyɩa -wɛe nyʋ -nɩɛ 'di ao 'je ʋʋ -wee' 'a ma" i -sa a. Faʋn -nʋa -aʋn cɛn "jri "kpei -tie" -wɛe -a -plee 'mɛa. 25 Kaan ka la, -a -teɛ -ma -tea', -ɩn -ble -aʋn ka ɛ nmɔ "i 'de -ɛ "srɛ "i ɛ.